হঠাতে দুখবোৰ নামি আহে ক'ব নোৱাৰাকৈ

মই যেতিয়া সৰু আছিলোঁ (৭/৮ বছৰীয়া) তেতিয়া এটা কুকুৰ পুহিছিলোঁ। সৰ্পদংশনত সেই কুকুৰটোৰ মৃত্যু হৈছিল। সেই সময়ত মই মামা ঘৰত আছিলোঁ। তাৰ পিছত এটা মাইকী কুকুৰ আহি আমাৰ ঘৰত থাকিবলৈ লৈছিল। সেই কুকুৰটো বহু বছৰ আমাৰ লগতে আছিল। ৯ বছৰ মান। তাৰ পিছত এদিন হঠাতে জীৱনৰ শেষ নিশ্বাস ত্যাগ কৰে। তাইৰ পোৱালি এটা আছিল। শাৰীৰিকভাৱে দুৰ্বল আছিল। সেইটো ডেৰ বছৰ মান বাছিছিল। তাৰ পিছত আৰু কুকুৰ পুহিবলৈ বাদ দিওঁ। 

কুকুৰটো থকা দিনতে মেকুৰী এটাও আহি ঘৰ ধৰিছিল। তাইৰ বহু কেইবাৰ পোৱালি হৈছিল। ঊণি নামৰ মোৰ মেকুৰীটো আমাৰ খুবেই মৰমৰ আছিল। হঠাৎ এদিন তেওঁ নিৰুদ্দেশ হৈছিল। বহুত বিচাৰিও পোৱা নাছিলোঁ। খুব কষ্টৰে পাৰ হৈছিল সেই দিনবোৰ। ছমাহ পাৰ হোৱাৰ পিছত আকৌ ঘৰত আহি উপস্থিত হৈছিল। আকৌ কেইমাহমান পিছত পুনৰ নিৰুদ্দেশ হয়। তাৰ পিছত কেতিয়াও ঘূৰি নাহে। তেওঁৰ ভণীজনীক গাড়ীয়ে খুন্দিয়াই মাৰে। তাৰ পিছত আৰু এটা মেকুৰী আছিল। সেইটোও এসময়ত নিৰুদ্দেশ হয়। এবছৰ মাহ আগতে আকৌ আহিছিল। বুঢ়া হৈছে। এমাহ মান থাকি আকৌ নিৰুদ্দেশ। মেকুৰী পুহিবলৈও বাদ দিওঁ।

মই জন্মৰে পৰা আমাৰ ঘৰত গৰু দেখিবলৈ পাওঁ। এটা লাওমূৰা গাই গৰু আছিল। তাইক বিক্ৰী কৰা হৈছিল। যিটো মোৰ বাবে খুবেই কষ্টকৰ আছিল। তেতিয়া মই সৰু আছিলোঁ। তাৰ পিছত ৰামু আৰু মাহী নামৰ দুটা গাই গৰু আছিল। তাৰে ভিতৰত ৰামু আছিল মোৰ প্ৰিয়। দুয়োজনী একে মাকৰ আছিল। তাৰ পিছত আহিল সোণীয়া। সোণীয়া ডাঙৰ হৈছিল। তেতিয়ালৈকে পোৱালি জন্ম দিয়া নাছিল। হয়তো আৰু ছমাহ বা এবছৰ পিছত পোৱালি জন্ম দিলে হেঁতেন। কিন্তু হঠাতে বেমাৰ হ'ল। চিকিৎসা কৰা হয়। কিন্তু নাবাছিলে। তাৰ কেইবছৰমান পিছত সকলো গৰু বিক্ৰী কৰা হয়। বৰ্তমান গৰু নাই।

হাঁহ বা কুকুৰা এতিয়ালৈকে আমাৰ ঘৰত পোহা হোৱা নাই। মই যেতিয়া সৰু আছিলোঁ সেই সময়ত মায়ে পাৰ চৰাই পুহিছিল। পিছলৈ পুহা বাদ দিয়ে। 

যোৱা বছৰ দুটা শালিকা চৰাই আহি ঘৰ ধৰিছিল। আপোন হৈ পৰিছিল। পিছত বেলেগ শালিকাৰ আক্ৰমণত সিহঁতৰ মৃত্যু হয়।

এইবোৰ কাৰণতেই মই এতিয়া একো পুহিব নিবিচাৰোঁ। তথাপিও পত্নীয়ে বিচৰা বাবে ছাগলী এটা অনা হয়। ক'লা ৰঙৰ ছাগলী। ছাগলীজনী অনাৰ তিনি-চাৰিমাহ মান পিছত যোৱা ১ আগষ্ট (২০২৩) তাৰিখে এটা পোৱালি হয়। যোৱা ১৪ নৱেম্বৰ তাৰিখে ছাগলীজনীক ঘৰৰ সন্মুখৰ পৰাই কোনোবাই উঠাই লৈ যায়। পোৱালিজনী অকলশৰীয়া হৈ পৰে। সেয়ে ১৯ নৱেম্বৰত আৰু এজনী ছাগলী কিনি অনা হয়। কালিলৈকে (২ ডিচেম্বৰলৈকে) সকলো ঠিকেই আছিল। আজি (৩ ডিচেম্বৰ, ২০২৩) ৰাতিপুৱা উঠাৰ পিছত পোৱালিজনী উঠিব নোৱাৰা হৈ আছে। শৰীৰটো এৰি দিয়াৰ দৰে। চিকিৎসাললৈ লৈ গ'লোঁ। একো injection বা sline নিদিলে। কেবল এটা ঔষধৰ কথা ক'লে। ফাৰ্মাচীৰ পৰা ঔষটো কিনি ঘৰলৈ আহিলোঁ। Nurokind Plus Vet Syrup. ঘৰত আহি ঔষধ খুৱাই দিয়াৰ ৫ মিনিট মান পিছতে তাই সকলোকে কন্দুৱাই শেষ নিশ্বাস ত্যাগ কৰিলে। এতিয়া ১৯ নৱেম্বৰত কিনি অনা ছাগলীজনী আছে। তাই এতিয়াও আপোন হৈ পৰা নাই। আপোন হৈ পৰিলেই দুখ আহে। সেয়ে তাইক আৰু হয়তো নাৰাখিম। এনেকি আৰু কেতিয়াও কোনো জীৱ-জন্তু নুপুহিম।

                                    কন্দৰ্পজিৎ

"নষ্ট প্ৰেমিকৰ নষ্ট প্ৰেমৰ অসম্পূর্ণ অধ্যায়" (New and Edited Version)

(১) অনামিকা বর্মন : হয়তো মই তাইক ভাল পাইছিলোঁ। কিন্তু কথাটো মই নিজেই অনুভৱ কৰিব পৰা নাছিলোঁ। তাইৰ বিয়াৰ পিছতহে কথাটো মোৰ হৃদয়ে অনুভৱ কৰিবলৈ লৈছিল। তাইক লগ নোপোৱা ২০ বছৰেই পাৰ হৈ গ'ল। 

(২) প্ৰিয়দর্শিনী কলিতা : তাইক ভাল পাইছিলোঁ যদিও সেয়া উচিত নাছিল। সম্বন্ধত তাই মোৰ পেহী হয়। কথাটো আগতে জনা নাছিলোঁ। ভুল!

(৩) সুলোচনা ব্ৰহ্ম : তাইক মই খুব ভাল পাইছিলোঁ। কিন্তু তাই নুবুজিলে। বহুতো ঘাত-প্ৰতিঘাত, বিপদক নেওচিও তাইক ভাল পাবলৈ প্ৰস্তুত আছিলোঁ। কিন্তু কিছুমান ব্যক্তিয়ে তেতিয়াৰ সশস্ত্ৰ উগ্ৰপন্থী BLTৰ ওচৰত মোৰ বিৰুদ্ধে জাননী দিছিল। তথাপিও মই ভয় খোৱা নাছিলোঁ। কাৰণ উগ্ৰবাদীৰো এখন হৃদয় থাকে, সিহঁতেও হয়তো এদিন কাৰোবাৰ প্ৰেমত পৰে। কিন্তু বিশেষ কাৰণত তাইক এৰিবলৈ বাধ্য হওঁ, যিটো মোৰ বাবে খুবেই কষ্টকৰ আছিল।

(৪) বিপাশা ৰয় : সুলোচনা এৰি যোৱাৰ সুযোগলৈ তাই মোলৈ প্ৰেমৰ প্ৰস্তাৱ দিলে। মানি ল'লোঁ। কিন্তু যেতিয়া তাইৰ নষ্ট চৰিত্ৰৰ কথা গম পালোঁ তেতিয়া বন্ধু-বান্ধৱীসকলক মাতি এখন মিটিং মাতিলোঁ। আৰু তাইক তালক দিলোঁ। তাইয়ো চহী কৰি দিলে। তাইৰ পিছত তাইৰ বিয়া হৈছিল। কিন্তু বর্তমান স্বামীৰ দ্বাৰা পৰিত্যক্ত।

(৫) সাগৰীকা দেব : তাই এতিয়া ব্যক্তিগত খণ্ডৰ এখন স্কুলত চাকৰী কৰে। মধুৰীআম পকিলে আজিও সাগৰীকালৈ মনত পৰে।

(৬) কল্পিতা মণ্ডল : তাইক যেতিয়া বিদায় জনাইছিলোঁ সিদিনা আছিল ভেলেনটাইচ ডে।

(৭) দ্বীপান্বিতা মণ্ডল : দেউতাক বাংলাভাষী যদিও অসমীয়া ভাষা ভালদৰে জানিছিল। মাকজনী অসমীয়া। বৰপেটা জিলাৰ। তাইৰ মাক-দেউতাক ৰাজি আছিল। কিন্তু সময়ৰ কিবা এটা পাকচক্ৰত পৰি তাইক হেৰুৱাবলৈ বাধ্য হওঁ। বর্তমান তাই বিবাহিতা। দুজনী যমজ ছোৱালী। শিলিগুড়িত থাকে। বিয়াৰ পিছত এবাৰ লগ পাইছিলোঁ। তাৰ পিছত ম'বাইলত যোগাযোগ চলি আছিল। কালক্ৰমত যোগাযোগ বন্ধ হয়। 

(৮) অনামিকা কলিতা : সম্প্ৰতি তায়ো বিবাহিতা। অনামিকা, যাৰ শৰীৰত মই প্ৰথম স্পর্শ কৰিছিলোঁ।

(৯) কুঁৱলী ৰয় : তেতিয়া মই এজনী বিষণ্ণ ব্যক্তি। প্ৰেমহীনতনা স্মৃতিৰ চিগাৰেট হুঁপো। মোৰ লগত পঢ়া দুজনী ছোৱালীয়ে একেলগে প্ৰেমৰ প্ৰস্তাৱ দিলে। সিহঁতৰ কথা যাক মন যায় তাকে ভালপাব পাৰোঁ। তাৰ বাবে সিহঁতৰ এজনীয়ে আনজনীক বেয়া নাপাব। ৰশ্মিতা বর্মন আৰু কুঁৱলী ৰয়। কুঁৱলীক পচন্দ কৰি ল'লোঁ। আমি তেতিয়া B.A. পঢ়োঁ। তাৰ পিছত প্ৰেমত পৰি গ'লোঁ ৰক্তিমা মেধীৰ। কথাটোৱে কুঁৱলীক দুখ দিলে। আৰু তাই দিয়া অন্তিম চিঠিখন পঢ়িলে মই নিজকে অপৰাধী যেন অনুভৱ কৰোঁ। বহু বছৰ পাৰ হৈ যায় কুঁৱলীক লগ নোপোৱা। বহু বছৰৰ পাছতহে তাইক লগ পাওঁ। এতিয়া তাই বিবাহিতা। এজন ল'ৰা আৰু এজনী ছোৱালী আছে। _বৰ্তমানো মাজে সময়ে ফোনত কথা পাতোঁ।_

(১০) ৰক্তিমা মেধী : ৰক্তিমাক খুবেই ভাল পাইছিলোঁ। তাইৰ ঘৰৰ পৰা যেতিয়া বাধা পালোঁ তেতিয়া তাইৰ নামত এটা কবিতা লিখি কাকত এখনলৈ পঠিয়াওঁ। প্ৰকাশ হোৱাৰ পিছত তাকেলৈ মিটিং হ'ল। অৱশেষত কাকতখনলৈ প্ৰেমৰ স্বীকাৰোক্তি এটা লিখি পঠিয়াও। সেইটোও প্ৰকাশ হয়। তাকেলৈ মোৰ ওচৰত কিছুমান ব্যক্তি প্ৰতিশোধ পৰায়ণ হৈ উঠিছিল। সময়ত সেইবোৰ অতীত হৈ গ'ল। এতিয়া তাইৰো বিয়া হৈ গৈছে। 

(১১) ৱাহিদা বেগম : হয়তো ধর্মৰ মাজত থকা বাধ্য-বাধকতাৰ বাবে তাই মোৰ প্ৰেমক স্বীকাৰ কৰিব নোৱাৰিলে।

(১২) প্ৰার্থনা সাহা : তাইয়ো এতিয়া বিবাহিতা। তেতিয়া সন্ধিয়া সন্ধিয়া তাইক চাবলৈয়ে বাইকৰ তেল খৰচ কৰি ৭ কিঃমিঃ যাব লগা হৈছিল। একে লগে পঢ়া আছিলোঁ। কিন্তু তেতিয়া প্ৰেমত পৰা নাছিলোঁ। পঢ়া বাদ দিয়াৰ পিছতহে তাইৰ প্ৰেমত পৰোঁ। তাই মোৰ প্ৰেমক গ্ৰহণ নকৰিলে। তেতিয়া মোৰ হৃদয়ত এটাই কথা আছিল ---

"দুষ্ট মেয়ের মিষ্টি হাঁসি,

সত্যি সত্যি প্রার্থনা

আমি তোমাকে ভালবাসি"

     ওপৰত উল্লেখ কৰা ঘটনাবোৰৰ বাহিৰেও আন বহুতৰে প্ৰেমত পৰিছিলোঁ। বহুতকে ক'ব পৰা নাছিলোঁ। বহুতকে এবাৰেই লগ পাইছোঁ। কাৰোবাক বাছত, কাৰোবাক বজাৰত, কাৰোবাক ৰেলত, কাৰোবাক গ্ৰন্থমেলাত ...

     সিহঁতৰ বিভিন্ন নাম দি ডায়েৰীত লিখি ৰাখিছিলোঁ। আজিলৈকে এনেদৰে শতাধিক নাৰীৰ প্ৰেমত পৰিছোঁ। এতিয়া আৰু নামবিলাক লিখি আপোনালোকক আমনি দিব নিবিচাৰোঁ। আৰু কাক ক'ত লগ পাইছিলোঁ কিছুমান মনত আছে, কিছুমান পাহৰণিৰ গর্ভত ।

"প্ৰেম হয়তো একটা উড়ন্ত মৌ-মাছি !

আমার যাকে মন যায়,

আমি তাকে ভালোবাসি !"

     বহুদিন ছিমৰণৰ প্ৰেমত পৰিছিলোঁ। কিন্তু ক'ব পৰা নাছিলোঁ। এনেকুৱা সৰু সুৰা বহুতো ঘটনা আছে। এইখিনিতে হঠাতে এজনী ছোৱালীৰ কথা মনত পৰিল। কোনো প্ৰেম অবিহনে তাই ডাইৰেক্ট মোক যৌনতাৰ প্ৰস্তাৱ দিছিল। মই প্ৰেমিক ব্যক্তি। গভীৰ প্ৰেমত যৌনতাৰ কথা আহি যাব পাৰে। কিন্তু প্ৰেমহীন যৌনতাক মই মানি ল'ব নোৱাৰোঁ। সেয়ে মানি নল'লোঁ। এতিয়া তাইয়ো বিবিহিতা। এনেকুৱা আৰু সৰু সৰু বহুত ঘটনা আছে। সেইবিলাক আৰু নকওঁ দিয়ক।

(১৩) এদিনৰ সংবাদ, জালাহৰ নামাই ঈপ্সিতা তালুকদাৰ আৰু এজন নষ্ট অকবিৰ আত্মহত্যা :

    দৈনিক অসমীয়া বাতৰি কাকত 'এদিনৰ সংবাদ'ৰ ২০/০৮/২০০৮ সংখ্যাত প্ৰকাশ হৈছিল 'সিমান সহজ নহয় তোমাক বিদায় জনোৱা' নামৰ মোৰ কবিতাটো। কবিতাটো পঢ়ি জালাহৰ পৰা এজনী ছোৱালীয়ে ফোন কৰিছিল। মোৰ বয়স জানিব বিচাৰিলে। কলোঁ। মোতকৈ তাই ডাঙৰ। তাইৰ সৰু ভনী আছে বুলি ক'লে আৰু তাইৰ ভনীৰ লগত কথা পাতিবলৈও দিলে। তাইৰ ভনীৰ নাম ঈপ্সিতা তালুকদাৰ। ঈপ্সিতাৰ প্ৰেমত পৰিলোঁ। বহু দিন এনেদৰেই গ'ল। ঈপ্সিতা, মোৰ টেলিফোনিক প্ৰেমিকা। নেদেখাকৈয়ে প্ৰেম-ভালপোৱা।...

 

      তাইৰ ককাইদেউ (দাদা) বাহিৰত কিবা কাম কৰে। ঘৰলৈ আহি কথাবোৰ শুনে। পিছলৈ তেওঁৰ বাবে আমাৰ প্ৰেমৰ যৱনিকা পৰিল। সেইদিনা মই গুৱাহাটীত আছিলোঁ। জালাহলৈ ফোন কৰিলোঁ। জালাহ সম্প্ৰতি বাক্সা জিলাত। ফোন ৰিচিভ কৰিলে বাইদেউয়ে। অলপ কথা পাতিলোঁ, তাৰ পিছত ঈপ্সিতাক দিবলৈ ক'লোঁ। তাই কলে তাইৰ দাদাই এই সম্বন্ধ মানি ল'ব নিবিচাৰে। তেখেতৰ ভাষাত কবিবোৰ নষ্ট। ভাল মানুহে কবিতা নপঢ়ে। এতিয়া এজন নষ্ট অকবিৰ মৃত্যুৰ কথা। এদিন সন্ধিয়া সাপটগ্ৰামত মই আৰু ৰমেনদাই মদ খাই দীপান্বিতা মণ্ডলৰ ঘৰলৈ যাওঁ। তাইয়ো মোৰ প্ৰেমিকা আছিল। বিয়া হৈছে শিলিগুড়িত। (দীপান্বিতাৰ কথা ইতিমধ্যে কৈছোঁ)। তাতে দুয়োজনে আলোচনা কৰিলোঁ। তাৰ পিছত ৰমেন দাই সেই ছোৱালীজনীৰ ম'বাইলত ফোন কৰিলে। বায়েকে ফোন ৰিচিভ কৰিলে। ৰমেন দাই ক'লে: মই অ'.ছি. দিগন্ত কলিতাই কৈ আছোঁ। সাপটগ্ৰাম থানাৰ পৰা। কন্দর্পক চিনি পায় নহয়। তেওঁ আত্মহত্যা কৰিছে। তেওঁৰ লগত তোমালোকৰ সম্বন্ধ কি..... ইত্যাদি ইত্যাদি।

      কেইদিন মান পিছত সেই ছোৱালীজনীৰ ফোনৰ পৰা কল আহিল। ৰিচিভ কৰিলোঁ, পুৰুষ কণ্ঠ। মই ক'লোঁ: হেল্ল', কোনে কৈছে? তেওঁ কন্দর্পৰ বন্ধু বুলি ক'লে। মোৰ পৰিচয় সোধাত ক'লোঁ: মইয়ো কন্দর্পৰ বন্ধুই কৈ আছোঁ।

     তেখেতে সুধিলেঃ কন্দর্পজিৎ কল্লোল নাই নেকি? মই ক'লোঁ: তেওঁ আৰু এই পৃথিৱীত নাই। জালাহৰ কোনোবা এজনীৰ ছোৱালীৰ বাবে তেওঁ আত্মহত্যা কৰিছে। তেখেতে দুখ প্ৰকাশ কৰিলে। মোক সুধিলে ছোৱালীজনীৰ নম্বৰটো পাওঁ নেকি? মই নাপাওঁ বুলি ক'লোঁ। কেইদিনমান পিছৰ পৰা সেই নম্বৰটোত বহুত চেষ্টা কৰিছোঁ কিন্তু কোনো দিনে নালাগিল।

    এজন নষ্ট অকবিৰ বাবে এজনী ছোৱালীৰ ছিমকার্ড এখন বর্বাদ!

(১৪) ৰাগিণী বর্মন : মই দিয়া নাম ৰাগিণী বর্মন। আচল নাম ৰুণুমী বর্মন। কেইদিনমানৰ প্ৰেমিকা। তাকো অজব দুনীয়াৰ গজব প্ৰেম! তাৰ পিছত এতিয়ালৈকে মোৰ প্ৰেয়সী+পত্নী। তাইক মই দুবাৰ বিয়া কৰাইছোঁ। এজন ব্যক্তিয়ে এজনী যুৱতীক দুইবাৰ বিয়া! হয়, সঁচা কথা। আগতে ক'ৰোবাত লিখিছিলোঁ। আজি আৰু এইবিষয়ে নকওঁ। পিছত কেতিয়াবা কম বাৰু।

                              ✍ কন্দৰ্পজিৎ

অমৃতৰ জয়গান

এসময়ত এজন ৰজা আছিল 

ৰজাই কৈছিল, “হাত চাপৰি বজোৱা”

      প্ৰজাই বজাই দিছিল হাত চাপৰি 

ৰজাই কৈছিল, “ভগা ঢাৰি বজোৱা”

    ‌ প্ৰজাই বজাই দিছিল ভগা ঢাৰি

... তথাপি ৰজা সন্তুষ্ট হোৱা নাছিল ...

কৈছিল, “চাকিবিলাক বন্ধ কৰি দিয়া”

প্ৰজাই চাকি বন্ধ কৰি এন্ধাৰত ৰৈছিল 

ৰজাই কৈছিল, “বিজ্ঞানক লাথ মাৰা”

                 প্ৰজাই লাথ মাৰি দিছিল

ৰজাই কৈছিল, 

“সূৰ্য্য পৃথিৱীৰ চাৰিওফালে ঘূৰে”

   প্ৰজায়ো তাকেই মানি লৈছিল

কিছুমান প্ৰজা জন্মান্ধ আছিল

কিছুমান প্ৰজা ভয়ান্ধ আছিল

  আৰু ৰজাৰ কথা নমনা 

                           দুই-চাৰিজনক

  গেলিলিঅ' বনাই

      অন্ধকূপত এৰি দিয়া হৈছিল 

ৰজাই কৈছিল, “অন্ধবিশ্বাসী হোৱা”

         প্ৰজাগন অন্ধবিশ্বাসী হৈছিল 

সেইসকল প্ৰজাই নদীক ৰোধ কৰিবলৈ

          মোনাত বান্ধি লৈছিল এমুঠি মন্ত্ৰ

... ॐ नद्याय: नमः ... ... ॐ नद्याय: नमः ... 

ৰজাই কৈছিল, “অমৃত পান কৰা”

       প্ৰজাই পান কৰিছিল অমৃত

সেই দিনৰ পৰাই সকলো প্ৰজাৰ

                       সপোনতো অমৃত

                        দিঠকতো অমৃত

সেই দিনৰ পৰাই

                          মুত্ৰতো অমৃত

                       ঔষধতো অমৃত

                      গছবোৰো অমৃত

                    মাটিবোৰো অমৃত

                       কলহতো অমৃত

                      মদিৰাতো অমৃত

    চাৰিওফালে অমৃতেই অমৃত

                   অমৃত পান কৰি 

সকলো প্ৰজাই অমৰ হৈছিল 

তেতিয়াৰে পৰা ৰজাও অমৰ

               প্ৰজাসকলো অমৰ

প্ৰজাৰ আৰু 

মৃত্যুলৈ ভয় নোহোৱা হৈছিল

আৰু তেতিয়াৰে পৰা প্ৰজাই 

আৰম্ভ কৰি দিছিল

অন্য এক আন্দোলন

অ-মৃত আন্দোলন

এতিয়া সেই ৰজাও নাই

এতিয়া সেই প্ৰজাও নাই

কেৱল বতাহত ভাঁহি উঠে

     জনশ্ৰুতিৰ লোকগান!

অমিও সেই অমৃতৰেই সন্তান

     ব'লক আকৌ এবাৰ গাওঁ 

                 অমৃতৰ জয়গান!

© ✍ #কন্দৰ্পজিৎ

পানী আৰু নদী

“No man ever steps 

in the same river twice, 

for it's not the same river 

and he's not the same man.”     

                          ― Heraclitus.

নদী মানেই পানী

অথচ পানী মানেই নদী নহয়

পানীৰ কোনো ৰং নাই

পানী পানীৰ দৰেই পনীয়া

তাৰ পিছতো মানুহে 

পানীত মিহলি কৰিছে ৰং

পানীৰ কোনো স্বাদ নাই

তাৰ পিছতো মানুহে 

পানীত বাকিছে স্বাদ

পানী নিৰৱধি

তাৰ পিছতো মানুহে

বন্দী কৰিছে পানীক

অৰ্থাৎ পানীক পানীৰ দৰে 

থাকিবলৈ দিয়া নাই মানুহে

সেইবাবেই হয়তো মাজে-সময়ে

বিদ্ৰোহী হৈ উঠে পানী

পানীৰো আছে নানা ৰূপ

বৰষুণৰ পানী

নদ-নদীৰ পানী

সাগৰ-মহাসাগৰৰ পানী

এনে কি চকুপানীবোৰো পানীয়েই

মানুহে মানুহক ভাগ কৰাৰ দৰেই 

পানীকো নানা ভাগত ভাগ কৰি লৈছে

পানীৰ পৰা পানীক আঁতৰাই

অন্য নামেৰে নামাকৰণ কৰিছে

আচলতে প্ৰস্ৰাৱবিলাকো পানী

চৰৱতবিলাকো পানী

পানী তৃষ্ণাৰ্তৰ প্ৰাণ 

এনেকি মদিৰা বুলি আন একো নাই

সেইবোৰো পানীয়েই

জীৱনাৰ্ত মানুহৰ জান

নদীবোৰ লগ লাগি পানী নহয়

পানীবোৰ লগ লাগি নদী হৈ বয়

আপুনি বাৰু নদীত স্নান কৰি পাইছেনে?

কিমানবাৰ আপুনি গাধুইছে নদীত?

এবাৰ... দুবাৰ... এশবাৰ... অসংখ্য বাৰ

বি:দ্ৰ: - আপোনাৰ হিচাপ শুদ্ধ নহ'বও পাৰে

কাৰণ,

এজন মানুহে এখন নদীত 

দুবাৰ গাধুব নোৱাৰে!

✍ #কন্দৰ্পজিৎ

🍁 বহুদিনৰ মূৰত প্ৰাচীন পাত এখিলা সাৰ পাই উঠিল 🍁

🍁 বহুদিনৰ মূৰত 

প্ৰাচীন পাত এখিলা 

সাৰ পাই উঠিল 🍁

==============

এসময়ত পাতৰ প্ৰেমিক আছিলোঁ

শুকান পাত 🍁

কেঁচা পাত 🌱

হালধীয়া পাত 🍁

সেউজীয়া পাত 🌱

মৰহি যোৱা পাত 🍂

পাত পাতেই

পাতৰ দৰে জীৱন 🏃

জীৱনৰ দৰে পাত 🌿

কিতাপৰ পাত 📖

বহীৰ পাত 📝

ডায়েৰীৰ পাত 📚

পাতত লিপিবদ্ধ হয় জীৱনৰ পাঠ

পাতত কবিতা

পাতত গল্প

পাতত উপন্যাস

পাতত খবৰ 🗞️

পাতত ইতিহাস 📕

পাতত উপাখ্যান

পাতত নষ্ট প্ৰেমিকৰ নষ্ট গদ্য

পাত পাতেই

পাতবিলাক আন কাৰো দৰে নহয়

পাতৰ দৰেই

আম গছৰ পাত

কঁঠাল গছৰ পাত

আঁহত গছৰ পাত

কদম গছৰ পাত

মোৰ প্ৰিয় হিজল গছৰ পাত

হাতত পাত 🍃

পাতত হাত 🍀

পাতৰ প্ৰেমিক 🪴

প্ৰেমিকৰ পাত ☘️

পাতত (a+b)² = a²+b²-2ab 

যদিহে ভুল হোৱা নাই

(অংকত সিমান ভাল নাছিলোঁ

এইবাবেই হয়তো

জীৱনৰ অংকৰ হিচাপ নলায়)

পাতত x+y = এটা সপোনৰ গান 

আগলতি কলা পাত ল'ৰে কি চ'ৰে

চিলনী আই মোৰ কাষৰতে পৰে

পাতত দিয়া মাছ 🐠

পাতত দিয়া খাৰ

পাতত দিয়া শাক 🥦

ৰৈ ৰৈ ৰৈ 🧍🧍🧍

গৈ গৈ গৈ 🏃🏃🏃

পাৰ হৈ হৈ হৈ🤾🤾🤾

অৰ্কুটৰ পাত

গুগল প্লাচৰ পাত

ফেচবুকৰ পাত

টুইটাৰৰ পাত

অৰ্কুট কি জানানে?

গুগল প্লাচ কি জানানে?

আমি সেই যুগৰ মানুহ

সেইবোৰ এতিয়া

পুৰি ছাই হোৱা পাত

টুইটাৰো ৰূপ সলাই এক্স হ'ল

ফেচবুকৰ পাতবোৰো

সেউজীয়াৰ পৰা হালধীয়া হৈ আছে ক্ৰমশঃ

পাতো সলনি হয়

মনৰ দৰে

মগজুৰ দৰে 

মানুহৰ দৰে

২৪ খিলা পাত = ১ দিস্তা

এতিয়া ১ দিস্তা = ১২ খিলা

চকুৰ আগতে পাতবোৰে ৰং সলালে

চকুৰ আগতে পাতবোৰে পৰিমাণ সলালে

অথচ মই আজিও স্থিৰপ্ৰজ্ঞ এক শিখাখণ্ড

শিলাখণ্ডৰ কথা আহিল যিহেতু

পাতক আলপ আঁতৰাই থৈ দিলোঁ

শিলাখণ্ডও পাতৰ দৰে প্ৰেমিক

কিন্তু শিলাখণ্ড পাতৰ দৰে অস্থিৰ নহয়

পাৰ্বতীৰ অক্ষত যোনীত

আজিও সাৰ পাই উঠে শিৱৰ শিলাখণ্ড

তাতেই লুকাই লুকাই বাজি উঠে

যৌৱনৰ তন্ত্ৰ-মন্ত্ৰ

পাত বতাহত উৰে

এই কবিতাটোও পাতৰ দৰে

ক'ৰ পৰা উৰি আহি ক'ত পালে

মই নিজেই নাজানো

আচলতে পাতৰ প্ৰেমত পৰি

কবিতা বুলি অকবিতাৰ হাত ধৰি

আকৌ এবাৰ জীৱনক অংকন কৰাৰ

এয়া এক আংবাং প্ৰয়াস

বহুদিনৰ মূৰত 

প্ৰাচীন পাত এখিলা 

সাৰ পাই উঠিল

যিখিলা পাতক কোনেও

বুটলি নাৰাখিলে নিজৰ মাজত!

✍ কন্দৰ্পজিৎ

কাৰ্বি ভাষা

     জনজাতীয় ভাষাসমূহৰ ভিতৰত মোৰ দৃষ্টিত সহজ ভাষা হ'ল বড়ো, ককবৰক, ৰাভা, গাৰো আদি। আনহাতে কঠিন ভাষা হ'ল মিচিং ভাষা। আনহাতে কাৰ্বি ভাষা মাজ ভাগত। ই চীনা-তিব্বতীয় ভাষা পৰিয়ালৰ অন্তৰ্গত কিন্তু ইয়াৰ স্থান স্পষ্ট নহয়। সেয়ে হয়তো ভাষা বিজ্ঞানী শ্বাফাৰ আৰু ব্ৰেডলীয়ে মিকিৰ ভাষাক এক পথচ্যুত কুকি-চিন ভাষা বুলি শ্ৰেণীকৰণ কৰিছে। কাৰ্বি ভাষাৰ পুৰণি নাম মিকিৰ ভাষা। কাৰ্বি ভাষা আকৌ মূলতঃ দুই প্ৰকাৰৰ - পাহাৰীয়া কাৰ্বি (অসমৰ কাৰ্বি আংলং জিলাৰ ৰংখাং উপভাষা) আৰু ভৈয়ামৰ কাৰ্বি বা ডোম্‌ৰা কাৰ্বি (অসমৰ কামৰূপ জিলা আৰু মৰিগাঁও জিলা আৰু মেঘালয়ৰ ৰি-ভৈ জিলাত কোৱা হয়)। ডিফু অঞ্চলৰ ভাষাক বৰ্তমান মান্য ভাষা হিচাপে ধৰি লৈছে। কাৰ্বি মানুহৰ সংখ্যা প্ৰায় ৪২ লাখ। এসময়ত কাৰ্বি ভাষা অসমীয়া লিপিৰে লিখা হৈছিল যদিও বৰ্তমান ৰোমান লিপিৰে লিখা হয়। কাৰ্বি ভাষাত বৰ্ণৰ সংখ্যা কম। অসমীয়া লিপিৰে লিখাৰ ক্ষেত্ৰত যিকেইটা বৰ্ণৰ প্ৰয়োজন হয়, সেইকেইটা হ'ল - অ আ ই এ ও ক খ ঙ চ ছ জ ত থ দ ধ ন প ফ ব ভ ম য ৰ ল ৱ হ আৰু ং। আনহাতে কাৰ্বি ভাষাত ব্যৱহাৰ যুক্ত বৰ্ণ বিলাক হ'ল - ক্ৰ ক্ল খ্ৰ থ্ৰ প্ৰ প্ল ফ্ৰ ফ্ল হ্ৰ হ্ল। কাৰ্বি ভাষাত কিছুমান বাক্য বিভিন্ন ধৰণে প্ৰকাশ কৰা দেখিবলৈ পোৱা যায়। যেনে - মই তোমাক ভালপাওঁ - নে নাং ফান নিং দ’ক / নে নিং নাং হাং পিক / নে নাংফান নিং নাংদ'ক / নে নাংফান নিং নাংহাং ......। তাৰোপৰি কাৰ্বি ভাষাত কিছুমান একেই শব্দ সুৰৰ ওপৰত ভিত্তি কৰি ভিন্ন অৰ্থ প্ৰকাশ কৰে। যেনে - মে² - ভিনদেউ, মে¹ - জুই, মে’¹ - ভাল। ফু¹ - মূৰ, ফু² ককাদেউতা। (¹ = নিম্ন সুৰ, ² = উচ্চ সুৰ)।

‌ ড° অৰ্পণা কোঁৱৰৰ প্ৰবন্ধৰ পৰা লোৱা কিছুমান কাৰ্বি ভাষাৰ বাক্য তলত দিয়া হ'ল -

• নে আন চ’ - মই ভাত খাওঁ

• চাইনং বাপচ’ - গৰুৱে ঘাঁহ খায়

• লা কিতাপ ত’ক - সি কিতাপ লিখে

• নে নাং ফান নিং দ’ক - মই তোমাক ভাল পাওঁ

• নে ফান মাৰৱে এপুম - মোক এটা আম দিয়া 

• চহাং-চৰেক আকান ছাং চিকিপ ইছি পিথা - ভিক্ষাৰীক চাউল এমুঠি দিয়া 

• নে কলম পেনছি ত'ক - মই কলমেৰে লিখোঁ

• নে হেম দামজি - মই ঘৰলৈ যাম

• নে বজাৰ পেনছি অ'ক নাম - ম‍ই বজাৰৰ পৰা মাছ আনিছোঁ

• দিফুছি বাজাৰ দ' - দিফুত এখন বজাৰ আছে

• হি থাই আলং হন-হনথা আৱে - বজাৰত শাক-পাচলি নাই

     কাৰ্বি ভাষাৰ সংখ্যা - https://www.omniglot.com/language/numbers/karbi.htm

     দৈনন্দিন জীৱনত ব্যৱহৃত ৬০ টা কাৰ্বি বাক্য - https://www.dimasathairili.com/2022/07/karbi-sentences.html?m=1

কাইলৈ হয়তো মই নাথাকিম

কাইলৈ হয়তো মই নাথাকিম

আৰু মই নথকাৰ এই বাতৰি 

হয়তো আপুনি প'ষ্ট কৰিব 

আপোনাৰ টাইমলাইনত

আপোনাৰ সেই প'ষ্টত 

সকলোৱে 😪 ৰিয়েচন দিব

  

কিছুমানে অৱশ্যে 👍 কৰিব

আন দুই-চাৰিজন বোকা****ই

❤️ অথবা 😆 দিব

কাইলৈ হয়তো মই নাথাকিম

আৰু মই নথকাৰ এই বাতৰি শুনি

কিছুমানে মোৰ প্ৰফাইল খুচৰি চাব

এনেদৰেই কিছুদিন পাৰহৈ যাব

তাৰ পিছত মোৰ টাইমলাইনত

মকৰাই জাল বান্ধিব

শগুনে মৰাশ বিচাৰি অহাৰ দৰেও

কোনেও নাহিব এবাৰো

তাৰ পিছত আপুনি আপোনাৰ পথত

আৰু মই বিষাদৰ বেহেলা বজাই

তাণ্ডৱ নৃত্য কৰিম এন্ধাৰৰ গৰ্ভত!

#কন্দৰ্পজিৎ

২৪/০৭/২০২৩

অন্ততঃ তেওঁ বুজিব পাৰিব লাগিছিল

অন্ততঃ তেওঁ বুজিব পাৰিব লাগিছিল

কিদৰে শুকাই যায় অশ্ৰুৰ টোপাল

অন্ততঃ তেওঁ বুজিব পাৰিব লাগিছিল

কিদৰে মৰাশ এটাও জীয়াই থকাৰ সপোন দেখে

অন্ততঃ তেওঁ বুজিব পাৰিব লাগিছিল

তেজৰ সোঁতত নৈ বয়

অন্ততঃ তেওঁ বুজিব পাৰিব লাগিছিল

যি বুজিব নোৱাৰিলে তেওঁ

আৰু মই ......

আৰু মই 

বুজিও নুবুজা এটা শ

টিকা ফঁটা ৰ'দত শুকাই নিজৰেই মৃতদেহ !

#কন্দৰ্পজিৎ

২৩/০৭/২০২৩

ডোমাৰী ভাষা

ভাৰতত ডোম জাতিৰ মানুহ আছিল বুলি আপুনি নিশ্চয় শুনিছে। এতিয়াও হয়তো কিছু সংখ্যক আছে, কিন্তু কালক্ৰমত তেওঁলোকে আন ভাষাক আদৰি লোৱাৰ ফলত নিজৰ ডোমাৰী ভাষা হেৰুৱাই পেলাইছে। কিন্তু আশ্চৰ্য্যৰ কথা যে পৃথিৱীৰ আন কিছুমান দেশত এই ভাষাৰ মানুহ আছে বুলি জানিবলৈ পোৱা গৈছে। কিন্তু তেওঁলোক একত্ৰিত নহয়, বিভিন্ন দেশৰ বিভিন্ন অঞ্চলত সিঁচৰতি হৈ আছে। আচৰিত কথা যে, তেওঁলোকে নিজৰ ভাষা হেৰুৱাই পেলোৱা নাই।

ডোমাৰী হৈছে ভাৰতৰ পৰা বিলুপ্তপ্ৰায় আৰ্য্য ভাষা। এই ভাষাৰ মানুহ মধ্যপ্ৰাচ্য আৰু উত্তৰ আফ্ৰিকাত সিঁচৰতি হৈ আছে। এই ভাষাটো আজাৰবাইজানৰ উত্তৰ দিশত আৰু মধ্য চুডানৰ দক্ষিণলৈকে চলে। এই ভাষাৰ মানুহ তুৰস্ক, ইৰাণ, ইৰাক, পেলেষ্টাইন, ইজৰাইল, জৰ্ডান, ইজিপ্ত, চুডান, লিবিয়া, টিউনিছিয়া, আলজেৰিয়া, মৰক্কো, ছিৰিয়া আৰু লেবাননত বাস কৰে। আৰবৰ মানুহে তেওঁলোক নাৱাৰ বুলি কয়, কাৰণ তেওঁলোক আছিল যাযাবৰী জনগোষ্ঠী যিয়ে প্ৰথমে ভাৰতীয় উপমহাদেশৰ পৰা মধ্যপ্ৰাচ্যলৈ প্ৰব্ৰজন কৰিছিল। বৰ্তমান এই ভাষা ক'ব পৰা মানুহৰ সংখ্যা তিনি লাখৰো কম। ডোমাৰীৰ উপভাষা সমূহ হ'ল - নবাৰী, কুৰবাটি, হেলেবি, হালাব, কৰাচী, মাৰাশী, গৰাকা, চুৰি-বালি আৰু নাৰিকুৰাবা। এই ভাষা লিখাৰ ক্ষেত্ৰত অঞ্চল বিশেষে লেটিন, হিব্ৰু আৰু আৰৱী আখৰ ব্যৱহাৰ কৰা হয়।

প্ৰথমে এই ভাষাৰ কেইটামান সংখ্যা তলত দিলোঁ ⤵️

১ য়েক / য়িকা

২ দি

৩ তিৰিন

৪ ইষ্টাৰ

৫ পাঞ্জ

৬ ছাছ

৭ হাৱ্ত / হফ্ত

৮ হায়ছ্থ / হায়তেক

৯ নু

১০ দেজ

২০ ৱিচ

১০০ ছায়

এতিয়া কিছু শব্দ ⤵️

মই - আমা

আমি - এমে / আমিন

তুমি - আতু / তো

কোন - কানি / কো

কি - কি / কায়

ক'ত - কাতে / কেতা

কেতিয়া - কাৱাস / কাচি

কেনেকৈ - কেকে / কেনে‌ কাত

নহয় - না

সকলো - গিছ / গিছতানে

বহুত - বল / বু

কম - আকাম / টিকা

দীঘল - দীৰ্গা / দ্ৰংগে

মানুহ - মানুস / নাফাৰ

সাপ - সাপ / সাব

বাহু - দুদ

গছ - ছাদজ়াৰ / লাউৰা

ফল - ফাৱাকে

ঘাঁহ - হাছিছ

মাংস - মাচি

কণী - আনা

চুলি - ৱালভাল

মূৰ - ছিৰি / ছেৰ

কাণ - কান

চকু - আক্কি

নাক - পিৰিন

দাঁত - দান্দ 

জিভা - ঝিভ / জিব

নখ - নাইল

ভৰি - পাৱ

হাত - হস্ত / সস্ত

পেট - পেট

পিঠি - পিষ্ট 

পান কৰা - পি

খোৱা - কোৱা

জানা - ঝান / জান

শুৱা - ছুছ

মৰা - মাৰি / ম্ৰা

মাৰা - মাৰ

আহা - আও / আউ

দিয়া - দে

গোৱা (গানৰ ক্ষেত্ৰত) - গাক 

পানী - পানী

বৰষুণ - ৱাৰচ

নিমখ - লোন

জুই - আগ

কলা - কালা

ৰাতি - আৰাত

দিন - দিচ

বছৰ - ৱাৰচ

ঠাণ্ডা - সিল্দা

নতুন - নাৱা

আৰু - উ / ৱা

নাম - নাম

#কন্দৰ্পজিৎ

অসমীয়া - বড়ো - ককবৰক

নমস্কাৰ  

খুলুমবায় 

খুলুমখা

তুমি কোন? 

নৗং সৗৰ?  

নৗংনি ছাবু?

তোমাৰ নাম কি?  

নৗংনি মুঙা মা?  

নিনি মুঙ তামো?

মোৰ নাম কন্দৰ্পজিৎ   

আংনি মুঙা কন্দৰ্পজিৎ   

আনি মুঙ কন্দৰ্পজিৎ 

তোমাৰ কি খবৰ? / তুমি কেনে আছা? 

নৗংনি মা খবৰ ?  

নৗঙ ছাবো?

ভাল  

মৗজাং  

কাহামনো

তুমি কোন ঠাইৰ?  

নৗং ব'দে জাইগানি?  

নৗং বোৰোনি? 

মই সাপটগ্ৰামৰ  

আং সাপটগ্ৰামনি  

আং সাপটগ্ৰামনি

আমি ধুবুৰীলৈ যাওঁ  

জৗং ধুবুৰীয়াও থাংদোং  

চৗঙ ধুবুৰী থাহনগো

তেওঁ কিতাপ পঢ়ে  

বিয়ো বিজাব ফৰায়দৗং 

বো বিজাপ পোৰিখা

তেওঁ বিদ্যালয়লৈ যাব

বিয়ো ফৰায়সালিয়াও থাংবায়

বো ৰৗংনোগো থাহোংনাই 

এতিয়া তুমি কি কৰি আছা?

দানিয়া নৗং মা খালামদৗং?

তাবুকখে নৗং খৗলাই তংচা? 

মই কাম কৰি আছোঁ

আং খামানি খালামদৗং

আং তাংগৗই তঙো

তুমি ক'লৈ যোৱা?

নৗং বহায় থাংগৗন?

নৗং বৰো থাহঙৗই?

তেওঁ আজি ঘৰৰপৰা আহিছে

বিয়ৗ দিনৈ ন'নিফ্ৰাই ফৈদৗংমৗন

বো তিনি নোগো ফাইও

মই ৰাতি যাম

আং হৰাৱ থাংগৗন

আং হৰো থাহংখা

মই সুখী

আং গৗজৗনবাই

আং তংহোকজাক 

আহা

ফৈদৗ 

ফাইজাদি

সুপ্ৰভাত

মৗজাং ফুং

ফুং কাহাম

শুভৰাত্ৰি

মৗজাং হৰ

হৰ কাহাম

মই তোমাক ভালপাওঁ

আং নৗংখৌ মৗজাং মৗনৗ  

আং নোনো হামজাকগো

তুমি মোক ভালপোৱা নে?

নৗং আংখৌ মৗজাং মৗনবাই না?

নৗং আংকো হামজাগো?   

হয়

অৗ 

ইন' / আও

নহয়

নাঙা

ইন'হি

ধন্যবাদ

সাবায়খৰ

হামবাই

 

(কিবা ভুল পৰিলক্ষিত হ'লে অনুগ্ৰহ কৰি আঙুলিয়াই দিব।)

#কন্দৰ্পজিৎ

অসমীয়া - বড়ো - ককবৰক - গাৰো - জোংখা - তিব্বত - ৰাভা - কোচ

বড়ো ভাষাৰ লগত মিল থকা ভাষা বিলাক হ'ল - ককবৰক, গাৰো, জোংখা (Dzonkha), তিব্বত, ৰাভা আৰু কোচ ভাষা। ইয়াৰ ভিতৰত বড়োৰ সৈতে বেছি মিল থকা ভাষা হ'ল ত্ৰিপুৰাৰ ককবৰক ভাষা। আনহাতে জোংখা হ'ল ভূটানৰ ভাষা। তলত উল্লেখিত ভাষাসমূহৰ সংখ্যা বিলাক দিয়া হ'ল। (ইয়াত কিবা ভুল পৰিলক্ষিত হ'লে জনাব।)

অসমীয়া - বড়ো - ককবৰক - গাৰো -

             জোংখা - তিব্বত - ৰাভা - কোচ

শূন্য - লাথিখো - বুকচা - শুইনো - 

         লেক্‌কৰ - লাইকৰ - * - ৰিয়া

এক - সে - সা - সা - 

          চি - চিং - সা - সা

দুই - নৈ - নৗই - গ্নি/গিনি - 

        নি - নি - নিঙ - নিঙ

তিনি - থাম - থম - গিত্তাম - 

           চুম - চুম - তাম - তাম

চাৰি - ব্ৰৈ - ব্রৗই - ব্ৰি- 

          ঝি - শি - চেচা - ব্ৰি

পা‌ঁচ - বা - বা - বোঙ- 

         ঙা - ঙা - তলা - বৗঙ

ছয় - দ' - দোক - দোক - 

        দ্ৰু - ত্ৰুগ - ক্ৰোব - ম্ৰোব

সাত - স্নি - স্নি - স্নি/ছিনি - 

          দুৱেন - দুন - চিয়া - সিন

আঠ - দাইন - চাৰ - চেত - 

          গে - গ্যায় - গিন - গিন

ন - গু - চুকু - স্কু - 

      গু - গু - বিঙ - বিন

দহ - জি - চি - চিকুং/চিকিং - 

        চুথাম - চু - সাথা

এঘাৰ - জিসে - চিসা - চিসা - 

            চুচি - চুজি - সাসা

বাৰ - জিনৈ - চিনৗই - চিগ্নি/চিগিনি - 

         চুনি - চুনি - সানিঙ

তেৰ - জিথাম - চিথম - চিগিত্তাম - 

          চুচুম - চুচুম - সাতাম

চৈধ্য - জিব্ৰৈ - চিব্রৗই - চিব্ৰি - 

      ‌ চুঝি - চুশি - সাচেচা

পোন্ধৰ - জিবা - চিবা - চিবোঙা - 

              চুঙা - চুঙা - সাতলা

ষোল্ল - জিদ' - চিদোক - চিদোক - 

           ‌চুদ্ৰু - চুদু - সাক্ৰোব

সোতৰ - জিস্নি - চিস্নি - চিস্নি/চিছিনি - 

             চুদুৱেন - চুদুন - সাচিয়া

ওঠৰ - জিদাইন - চিচাৰ - চিচেত - 

           চুগে - চুগ্যায় - সাগিন

উনৈশ - জিগু - চিচুকু - চিচকু - 

             চুগু - চুগু - সাবিন 

বিশ - নৈজি - নৗইচি - কোলগ্ৰিক - 

         খেচি - নিশু - নিঙথা

একৈশ - নৈজিসে - নৗইচিসা - কোলগ্ৰিকসা - 

             নিয়াৰচি - নিশুৎচাজি - নিঙথা সা

ত্ৰিশ - থামজি - থমইচি - কোলাতচি - 

       ‌ * - চুমজু - থামথা

চল্লিশ - ব্ৰৈজি - ব্রৗইইচি - ছোতব্ৰি - 

 ‌‌ * - শিপজু - চেচাথা

পঞ্চাশ - বাজি - বাইচি - ছোতবোঙা -

           ‌ * - ঙাপজু - তলাথা

ষাঠি - দ'জি - দোকইচি - ছোতদোক - 

                 * - ত্ৰুকচু - ক্ৰোবথা

সত্তৰ - স্নিজি - স্নিইচি - ছোতস্নি/ছোতছিনি -  

                  * - দুনজু - চিয়াথা

আশী - দাইনজি - চাৰইচি - ছোতচেত - 

                       * - গ্যায়জু - গিনথা

নব্বৈ -গুজি - চুকুইচি - ছোতস্কু - 

                * - গুপজু - বিঙথা

এশ - জৌসে - সাৰা - ৰিতছাসা - 

                 * - গ্যা - সাথাথা

দুশ - জৌনৈ - নৗইৰা - ৰিতছাগ্নি/ৰিতছাগিনি - 

                * - গ্যানি - নিঙথাথা

হাজাৰ - ৰৗজা - চাই - হাজালসা - 

                    * - টং

দুই হাজাৰ - নৈৰৗজা - নৗইচাই - হাজালগ্নি/হাজালগিনি - 

                             * - টংনি

লাখ - লাখ - ৰাচাই

দুই লাখ - নৈলাখ - নৗইৰাচাই

কোটি - কোটি - ৰৗজাং

দুই কোটি - নৈকোটি - নৗইৰৗজাং

#কন্দৰ্পজিৎ

ঘূৰি নহা বাটেৰে

খবৰ বিচাৰি ফুৰা মানুহজন

খবৰ সংগ্ৰহ কৰিবলৈ ওলাই গ'ল

আজি নিজেই এটা খবৰ হৈ 

অন্য এক জগতৰ খবৰ বিচাৰি

কবিতা ভালপোৱা মানুহজন

কবিতা বিচাৰি ওলাই গ'ল

ঘূৰি নহা বাটেৰে ...... 

(ছত্ৰপতি গোস্বামী দাৰ স্মৃতিত) 🕉️

✍ #কন্দৰ্পজিৎ

০৬/০৭/২০২৩

ॐॐॐॐॐॐॐॐॐॐॐॐॐॐॐॐॐ

“অসমীয়া প্ৰতিদিন” কাকতৰ সাপটগ্ৰামৰ 

সাংবাদিক ছত্ৰপতি গোস্বামীয়ে আজি 

পুৱা দহমান বজাত ইহলীলা সম্বৰণ কৰে। 

ॐॐॐॐॐॐॐॐॐॐॐॐॐॐॐॐॐ

এখন হাত

=======

এখন হাত

শব্দৰে প্ৰকাশ কৰিব নোৱাৰিলোঁ 

এখন হাত

এটা কবিতা

কবিতা-অকবিতা একোৱেই নহ'ল 

উমহু লিখিব নোৱাৰিলোঁ 

আঁকিব নোৱাৰিলোঁ শব্দৰ আঁচ টানি

দূৰত্বই অনাস্পৰ্শৰ গৰ্ভলৈ ঠেলি দিয়া

এখন হাত

শৈশৱৰ সোণালী হাত

যৌৱনৰ ৰূপালী হাত

চকুপানী মচি দিবলৈও 

এখন হাতৰ প্ৰয়োজন

মোৰ তৃতীয়খন হাত

অনাস্পৰ্শিত তৃতীয়খন হাত আছে সিপাৰে ৰৈ

আৰু ইপাৰে স্মৃতিৰ গৰল পান কৰি আছোঁ মই

এখন হাত ......

হাত নহয়

শৈশৱৰ মাত

যৌৱনৰ বাট

আৰু সম্প্ৰতি 

সেই তৃতীয়খন হাত বিচাৰিলে 

মোৰ চাৰিওফালে বৈ আহে

শূন্যতাৰ নিনাদ !

✍ কন্দৰ্পজিৎ

হিন্দুৰ ব্ৰাহ্মণ্যবাদ, ধৰ্মান্তকৰণ, ভাৰতত বৌদ্ধৰ পতন আৰু দেৱদাসী প্ৰথা

(হেমন্ত শৰ্মাৰ ফেচবুক প'ষ্টৰ আঁতধৰি)

১/ মানক বা নামানক, ব্ৰাহ্মণৰ হৃদয় মানৱতাৰে ভৰা। 

     হয়, ব্ৰাহ্মণৰ হৃদয় ইমানেই মানৱতাৰে ভৰা যে তেওঁলোকৰ বাবেই এক শ্ৰেণীৰ হিন্দু ব্যক্তিক “অছুত” অৰ্থাৎ স্পৰ্শৰ বাহিৰত ৰখা হৈছিল। 

    ব্ৰাহ্মণৰ হৃদয় ইমানেই মানৱতাৰে ভৰা যে এইটো কৰিব নাপায়, সেইটো কৰিব নাপায় বুলি নিয়ম নিৰ্দ্ধাৰণ কৰি দিছিল আৰু নিয়ম ভঙ্গ কাৰিক প্ৰায়চিত্ত হিচাপে মানসিক, শাৰীৰিক আৰু আৰ্থিক দণ্ড দিয়া হৈছিল। এনে বহু জীৱন্ত কাহিনী আছে। তাকো ঐতিহাসিক বা প্ৰাক্ ঐতিহাসিক নহয়, স্বাধীনোত্তৰ যুগৰ কাহিনী।¹

    ব্ৰাহ্মণৰ হৃদয় ইমানেই মানৱতাৰে ভৰা যে, ভাৰতৰ বহু সনাতনী হিন্দু ব্যক্তিয়ে নিৰ্যাতন সহ্য কৰিব নোৱাৰি ধৰ্মান্তৰিত হৈছিল। আৰু তাক নাম দিয়া হৈছিল ধৰ্মান্তকৰণ। মোগল শাসন কালত কিছুসংখ্যক ব্যক্তি ভয়তে ইছলাম ধৰ্ম গ্ৰহণ কৰিছিল আৰু খ্ৰীষ্টান মিছনেৰীৰ আগমনৰ পিছত সিহঁতৰ আৰ্থিক প্ৰলোভনত কিছুমান মানু্হ খ্ৰীষ্টান ধৰ্ম গ্ৰহণ কৰিছিল। এয়া সঁচা। কিন্তু বহু সংখ্যক লোকে ব্ৰাহ্মণ্যবাদৰ হেঁচাত স্ব-ইচ্ছাৰে ধৰ্মান্তৰিত হৈছিল।

   ব্ৰাহ্মণৰ হৃদয় ইমানেই মানৱতাৰে ভৰা যে, সৌসিদিনা এজন ব্ৰাহ্মণ নেতাই দলিতৰ মূৰত প্ৰেচাৱ কৰি দিলে।²

    আচলতে ব্ৰাহ্মণ শব্দৰ শাস্ত্ৰীয় অৰ্থৰ ব্যাখ্যাক গুৰুত্ব নিদি জন্মগত ব্ৰাহ্মণ্যবাদক আন সকলো হিন্দুৱে মানি লোৱাৰ ফলস্বৰূপে এইবোৰ ঘটনাৰ পুনৰাবৃত্তি হয়।

   ব্ৰাহ্মণৰ হৃদয় ইমানেই মানৱতাৰে ভৰা যে, জন্মগত ব্ৰাহ্মণৰ ক্ষেত্ৰত হে সেইবোৰ মানৱতাবাদৰ কথা ওলাই আহে।

     

২/ ব্ৰাহ্মণ আছে বাবেই সমাজত আধ্যাত্মিক চিন্তা চৰ্চা অব্যাহত আছে। 

     হয়, ব্ৰাহ্মণ আছে বাবেই সমাজত আধ্যাত্মিক চিন্তা চৰ্চা অব্যাহত আছে। অন্যথায় আধ্যাত্মিক চিন্তাতকৈ মানৱতাবাদী চিন্তাৰ উত্থান ঘটিলেহেঁতেন। কিন্তু ব্ৰাহ্মণ্যবাদৰ আধ্যাত্মিক নিৰ্দেশাৱলীয়ে মানৱতাবাদৰ পতন ঘটাবলৈ সক্ষম হৈছে। 

    ব্ৰাহ্মণ আছে বাবেই সিহঁতৰ চিন্তাধাৰাকে সমাজত আধ্যাত্মিক চিন্তা বুলি প্ৰচাৰ কৰি আনৰ চিন্তাধাৰাক হেঁচা প্ৰয়োগ কৰি নিঃশেষ কৰিব পাৰিছে। 

   ব্ৰাহ্মণ আছে বাবেই শংকৰদেৱৰ বিৰুদ্ধে বিদ্ৰোহ ঘোষণা কৰিব পাৰিছিল, শংকৰদেৱক অসমৰ পৰা খেদি পঠিয়াব পাৰিছিল। 

   ব্ৰাহ্মণ আছে বাবেই বৌদ্ধ ধৰ্মক ভাৰতৰ পৰা নিঃশেষ কৰাৰ ক্ষেত্ৰত বহু পৰিমাণে সফল হ'ব পাৰিছে। 

৩/ আনুষ্ঠানিক শিক্ষা নাথাকিলেও ব্ৰাহ্মণৰ মগজটো বেলেগ৷

     হয়, আনুষ্ঠানিক শিক্ষা নাথাকিলেও ব্ৰাহ্মণৰ মগজটো বেলেগ৷ কাৰণ আনুষ্ঠানিক শিক্ষা নাথাকিলেও সিহঁতে শিক্ষিত ব্যক্তিৰ মগজুতো ধৰ্মৰ ঔষধ স্প্ৰে কৰিব পাৰে। সেইবাবেই আধুনিক শিক্ষাৰে শিক্ষিত হৈও, বিজ্ঞান বিষয়ত স্নাতকোত্তৰ উপাধি অৰ্জন কৰিও মানুহে তথাকথিত জন্মগত ব্ৰাহ্মণৰ চৰণ পখালি দিবলৈ অপেক্ষাৰত হৈ থাকে। 

     হয়, আনুষ্ঠানিক শিক্ষা নাথাকিলেও ব্ৰাহ্মণৰ মগজটো বেলেগ৷ কাৰণ সিহঁত যে জন্মগত ব্ৰাহ্মণ।

    খ্ৰীষ্টান পাদুৰী হ'বলৈ খ্ৰীষ্টান ধৰ্ম সম্পৰ্কে অধ্যয়ন কৰিবলগীয়া হয়, ইছলামৰ মোল্লা বা মৌলানা বা মৌলবী হ'বলৈ হ'লে ইছলাম ধৰ্ম সম্বন্ধীয় অধ্যয়নৰ প্ৰয়োজন হয়। বৌদ্ধ লামা হ'বলৈ হ'লেও বৌদ্ধ ধৰ্মৰ জ্ঞান আহৰণ কৰিবলগীয়া হয়। কিন্তু হিন্দু ধৰ্মৰ ব্ৰাহ্মণ হ'বলৈ হ'লে কোনো ধৰ্ম শাস্ত্ৰ অধ্যয়নৰ বা ধৰ্ম সম্পৰ্কে আনুষ্ঠানিক শিক্ষাৰ প্ৰয়োজন নহয়। ব্ৰাহ্মণ জন্মগত। এই ধাৰণা সকলো হিন্দু ধৰ্মাৱলম্বীৰ মাজত বিয়পাই দিয়াৰ ক্ষেত্ৰতো ব্ৰাহ্মণ সকলে সফল হৈছিল, কাৰণ আনুষ্ঠানিক শিক্ষা নাথাকিলেও ব্ৰাহ্মণৰ মগজটো বেলেগ৷

    বুদ্ধদেৱ বাহিৰৰ নাছিল। কিন্তু বৰ্তমান বৌদ্ধ ধৰ্মালম্বী লোকৰ ভিতৰত বেছি সংখ্যক ম্যানমাৰ, শ্ৰীলংকা, কম্বোডিয়া, লাওচ, ভূটান আদি দেশত দেখিবলৈ পোৱা যায়। বুদ্ধদেৱে বৌদ্ধ অৰ্থাৎ বোধ বা জ্ঞানক প্ৰাধান্য দিছিল। ঈশ্বৰৰ অস্তিত্ব সম্পৰ্কে একো উল্লেখ কৰা নাছিল। সেয়ে বৌদ্ধ ধৰ্মক নাস্তিকৰ ধৰ্ম বুলি প্ৰচাৰ চলাই ভাৰতত বৌদ্ধ ধৰ্মৰ প্ৰভাৱ হ্ৰাস কৰাৰ ক্ষেত্ৰতো এই বেলেগ মগজুৱে বিশেষ ভূমিকা লৈছিল। ব্ৰাহ্মণবাদৰ বিপক্ষে কবিতা লিখা বাবেই কবি নাগাৰ্জুনক দেশান্তৰিত কৰাৰ ক্ষেত্ৰতো বিশেষ ভূমিকা লৈছিল এই বিশেষ ধৰণৰ বেলেগ মগজুৱে। নাস্তিকৰ বিৰুদ্ধাচৰণ কৰিবলৈ মানুহৰ মন-মগজুত ধৰ্মীয় নিচাৰে নিচাশক্ত কৰি তুলিছিল এই সকলেই। নাস্তিকতাবাদ পাশ্চাত্যৰ পৰা অহা বুলি পাশ্চাত্য শিক্ষাৰ পৰাও মানুহক আঁতৰাই ৰাখিবলৈ চেষ্টা কৰিছিল এসময়ত। অৱশ্যে নাস্তিকতাবাদৰ জন্মদাতা চাৰ্বাক যে এজন ভাৰতীয় ঋষি তথা দাৰ্শনিক আছিল আৰু তেওঁ চাৰ্বাক দৰ্শনৰ সৃষ্টি কৰিছিল, এই কথা ভাৰততে ভালদৰে প্ৰচাৰ হ'বলৈ দিয়া নাছিল।

     কিছুমানে আকৌ বুদ্ধদেৱক ভগৱানৰ নৱম অৱতাৰ বুলি কৈ বৌদ্ধ ধৰ্ম হিন্দুৰ অংশ বুলি মানুহৰ মাজত প্ৰচাৰ চলাইছিল। আন কিছুমানৰ মতে ভগৱানৰ অৱতাৰ বুদ্ধ আৰু গৌতম বুদ্ধ একেজন ব্যক্তি নহয়। এইবিষয়ে আগতে লিখিছিলোঁ।³ আনহাতে কল্কি পুৰাণৰ মতে বুদ্ধ অৱতাৰৰ যোগেদি ভগৱানে মানুহক বামানয় শাস্ত্ৰৰ প্ৰতি আকৰ্ষিত কৰি বিপথে পৰিচালিত কৰাৰ কথা আছে। ভগৱানে বাৰু মানুহক বিপথে পৰিচালিত কৰিবলৈও অৱতাৰ লয় নে? তাতেই আকৌ উল্লেখ কৰিছে যে কল্কি অৱতাৰ হৈ বৌদ্ধগণক সংহাৰ কৰিব বুলি।⁴

    শংকৰদেৱ বিৰচিত কীৰ্ত্তন-ঘোষাতো উল্লেখ আছে⁵ —

       বুদ্ধ অৱতাৰে বেদপন্থ কৰি ছন্ন ।

    বামানয় সাস্ত্ৰে মুহি আছা অজ্ঞজন ॥

     নিচিন্তে চৰন নাম নলৱে তোহ্মাৰ ।

  সদায়ে প্ৰমত্ত লোক পাষণ্ড আচাৰ ॥১৩॥

     কলিৰ শেষত হৈবা কল্কি অৱতাৰ ।

    কাটি মাৰি ম্লেছক কৰিবা বুন্দামাৰ ॥

     সবাকু বধিবা বৌদ্ধগন যত আছে ।

কলিৰ শেষত সত্য প্ৰবৰ্ত্তাইবা পাছে ॥১৪॥

   এইবোৰ শাস্ত্ৰ হয়তো বুদ্ধদেৱে বৌদ্ধ ধৰ্ম প্ৰচাৰ কৰাৰ পিছত লিখা। কল্কি পুৰাণৰ মতে - বৌদ্ধ, নাস্তিক, ম্লেচ্চক ধ্বংস কৰি কলি কালক নিঃশেষ কৰাৰ উদ্দেশ্যে ভগৱানে কল্কি হিচাপে আবিৰ্ভাৱ হ'ব। এয়া একধৰণৰ স্ববিৰোধি মনোভাৱ নহয় নে? পৃথিৱীত থকা আন কোনো ধৰ্মৰ কথা ইয়াত উল্লেখ নাই। এনে কি হিন্দুৰ ভগৱানৰ অৱতাৰ কেৱল অবিভক্ত ভাৰততে নেকি? কোনো এটা অৱতাৰতো প্ৰাচ্য বা পাশ্চাত্যৰ দেশতো হ'ব পাৰিলেহেঁতেন! কোনো হিন্দু ভগৱানৰ অৱতাৰে নাইবা কোনো হিন্দু দেৱ-দেৱীয়ে প্ৰাচ্য বা পাশ্চাত্যৰ বিশেষ ভাবে প্ৰচলিত আন বেলেগ ধৰ্মৰ অপৰাধী ব্যক্তিক দণ্ড দিয়াৰ উদাহৰণ কিয় নাই? নে সেই ধৰ্মাৱলম্বীৰ লগত বলে নোৱাৰিব বুলি তেনে শাস্ত্ৰ লিখা নহ'ল?

    তেওঁলোক চতুৰ আছিল বাবেই নিজৰ স্বাৰ্থ পূৰণ কৰিবলৈ প্ৰকৃতিৰ উপাসক সকলকো হিন্দু ধৰ্মৰ অন্তৰ্গত কৰি লৈছিল। পাহাৰীয়া জনজাতীয় লোকসকলে হিন্দু ধৰ্মৰ বিষয়ে একো নাজানিছিল। সিহঁতে গছ, শিল আদিক উপাসনা কৰিছিল। হাবিত পোৱা ফল-মূল তথা যিকোনো বন্যপ্ৰাণীৰ মাংস সিহঁতে খাইছিল। এই গছ, শিল, পাহাৰ, নদী আদিৰ উপাসনাক পূজা বুলি কৈ সিহঁতক নিজৰ মাজলৈ টানি আনিছিল, ধৰ্মীয় শিক্ষা দিছিল, কিছু পৰিমানে সংস্কাৰিত বা পৰিৱৰ্তিত কৰিছিল। কিন্তু আকোঁৱালি ল'ব পৰা নাছিল। আনহাতে সেই জনজাতীয় লোকসকলে আকৌ কিছুমান পৰম্পৰা বাদ দিব পৰা নাছিল। সেইবোৰৰ বাবেই তেওঁলোকক অন্য দৃষ্টিৰে চোৱা হৈছিল। যাৰ বাবেই পৰৱৰ্তী সময়ত উত্তৰ-পূৰ্বাঞ্চলৰ বহুতো জনগোষ্ঠীয়ে খ্ৰীষ্টান ধৰ্ম গ্ৰহণ কৰে। কাৰণ সিহঁতে জনজাতীয় লোকসকলক নিজৰ পৰম্পৰাগত কিছুমান অভ্যাসৰ পৰা আঁতৰাই আনিবলৈ চেষ্টা কৰা নাছিল।

    এই ব্ৰাহ্মণ্যবাদৰ বাবেই সৃষ্টি হৈছিল সতীদাহ প্ৰথা, দেৱদাসী প্ৰথা আৰু বহুতো। 

দেৱদাসী সকলৰ জীৱন নিৰ্বাহ সম্পৰ্কে নতুনকৈ কোৱাৰ প্ৰয়োজন নাই। বৰ্তমান অধিকাংশ মানুহেই জানে সিহঁতৰ যন্ত্ৰণাময় অতীতৰ কাহিনী। কিন্তু সেইক্ষেত্ৰতো ব্ৰাহ্মণবাদী বেলেগ মগজুৱে কিদৰে সাধাৰণ মানুহৰ মন-মগজুক নিজৰ নিয়ন্ত্ৰণলৈ আনিবলৈ সক্ষম হৈছিল, এই বিষয়ে কম।

     মন্দিৰত কিয় ঘণ্টা লগোৱা হয়? মন্দিৰত প্ৰৱেশ কৰাৰ পূৰ্বে কিয় ঘণ্টা বজাব লাগে? (প্ৰস্থানৰ ক্ষেত্ৰত বজাব নালাগে।) জানেনে? এই সম্পৰ্কে ব্ৰাহ্মণ সকলে কয় — “ঘণ্টা বজালে মন্দিৰত স্থাপন কৰা দেৱ-দেৱীৰ মূৰ্তিবোৰত চেতনা জাগ্ৰত হয়। ইয়াৰ পিছত মানুহে কৰা পূজা অধিক ফলপ্ৰসূ হয়।”⁶

   তাৰ মানে ঘণ্টা বজোৱাৰ আগত দেৱ-দেৱী সকল শুই থাকে নেকি? যিয়েই নহওক, ব্ৰাহ্মণৰ এই যুক্তিক তেতিয়াৰ সাধাৰণ ৰাইজে মানি লৈছিল। সময় পৰিৱৰ্তন হ'ল। মানুহৰ চিন্তাধাৰাৰ বিকাশ হ'ল। সিহঁতৰো কিছুমানে শিক্ষা লাভ কৰি সকলো কথা বুজিব পাৰিছিল। কিন্তু ব্ৰাহ্মণ্যবাদৰ পতন ঘটাটো সিহঁতে নিবিচাৰে।

      তাৰ পিছত কিছুমান শিক্ষিত ব্ৰাহ্মণে ঘণ্টাৰ লগত বৈজ্ঞানিক সম্পৰ্ক স্থাপনৰ চেষ্টা কৰি নতুন যুক্তি দাঙি ধৰিলে — ঘণ্টা বাজিলে ইয়াৰ শব্দই বায়ুমণ্ডলত এক প্ৰবল কম্পনৰ সৃষ্টি কৰে। বতাহৰ বাবে ই কেৱল ওচৰতে নহয় বহু দূৰলৈও যায়। যাৰ বাবে পৰিৱেশত উপস্থিত থকা ক্ষতিকাৰক বেক্টেৰিয়া, ভাইৰাছ আৰু অণুজীৱবোৰ ঘণ্টাৰ কম্পনৰ প্ৰভাৱত ধ্বংস হৈ আমাৰ চৌপাশৰ পৰিৱেশ বিশুদ্ধ হৈ পৰে। তাৰোপৰি ঘণ্টাৰ শব্দৰ পৰা নিৰ্গত শব্দ সাত ছেকেণ্ডলৈকে প্ৰতিধ্বনিত হৈ থাকে। ঘণ্টাৰ প্ৰতিধ্বনিয়ে কিছু সময়ৰ বাবে আমাৰ শৰীৰৰ সাতটা চক্ৰ সক্ৰিয় কৰে, যাৰ ফলত নেতিবাচক চিন্তাৰ অন্ত পৰে আৰু শৰীৰটো ধনাত্মক শক্তিৰে ভৰি পৰে।⁷

    এইবিলাক আছিল মানুহক বুজনি দিয়াৰ বিভিন্ন কৌশল। কাৰণ সিহঁতৰ মগজু আন মানুহতকৈ পৃথক। বেলেগ মগজুৰ অধিকাৰী সিহঁত। এতিয়া আহো আচল কাহিনীলৈ — মন্দিৰৰ পূজাৰী সকলে দেৱদাসী সকলৰ লগত বিভিন্ন সময়ত যৌন সম্পৰ্ক স্থাপন কৰিছিল। সেয়ে সিহঁতে আলোচনা কৰি মন্দিৰৰ ঠিক বাহিৰৰ গেটত ঘণ্টাটো ওলোমাই থোৱাৰ ব্যৱস্থা কৰিছিল আৰু ভক্ত সকলৰ মনত অন্য এক ধাৰণা দিয়া হৈছিল। যাতে তেওঁলোকে প্ৰৱেশৰ পূৰ্বে কেইবাবাৰমান ঘণ্টা বজায়। কাৰণ ঘণ্টা বাজিলে পূজাৰীয়ে কোনোবা আহিছে বুলি গম পাব আৰু সচেতন হ'ব পাৰিব।⁸

    পৰম্পৰাগত ভাবে চলি অহা বাবে বৰ্তমানো এই নিয়ম প্ৰচলিত। বৰ্তমান আন একো কোনো বিশেষ কাৰণ নাই, যিহেতু বৰ্তমান দেৱদাসী প্ৰথা নাই। কিন্তু পৰম্পৰাগতভাৱে নিয়ম এটা হোৱাৰ পিছত সেই নিয়ম চলি থাকে।

   যিয়েই নহওক মানৱতাবাদেৰে ভৰা এই ব্ৰাহ্মণসকলক, আধ্যাত্মিক চিন্তাৰে ভৰপূৰ এই এই ব্ৰাহ্মণসকলক, বেলেগ ধৰণৰ মগজু সম্পন্ন এই ব্ৰাহ্মণসকলক অনুসৰণ কৰোঁ আহক!

✍ #কন্দৰ্পজিৎ কল্লোল

হেমন্ত শৰ্মাৰ ফেচবুক প'ষ্টৰ লিংক : https://m.facebook.com/story.php?story_fbid=6259244317516862&id=100002940663393&mibextid=Nif5oz

তথ্যসূত্ৰ:

1. https://kkallol2014.mobie.in/a2

2. https://www.google.com/amp/s/organiser.org/2023/07/04/182088/bharat/madhya-pradesh-cm-initiated-action-against-man-seen-in-the-viral-video-urinating-on-the-face-of-another-man/amp/

3. https://m.facebook.com/story.php?story_fbid=2512484302224262&id=100003881492215&mibextid=Nif5oz

4. https://hinduism.stackexchange.com/questions/18218/is-kalki-avatar-a-killer-of-buddhist

5. https://as.m.wikisource.org/wiki/%E0%A6%AA%E0%A7%8D%E0%A7%B0%E0%A6%A5%E0%A6%AE_%E0%A6%96%E0%A6%A3%E0%A7%8D%E0%A6%A1:_%E0%A6%9A%E0%A6%A4%E0%A7%81%E0%A7%B0%E0%A7%8D%E0%A6%AC%E0%A7%8D%E0%A6%AC%E0%A6%BF%E0%A6%82%E0%A6%B6%E0%A6%A4%E0%A6%BF_%E0%A6%85%E0%A7%B1%E0%A6%A4%E0%A6%BE%E0%A7%B0

6, 7. https://www.google.com/amp/s/www.amarujala.com/amp/photo-gallery/bizarre-news/ajab-gajab-hindu-temple-bells-why-do-bells-rings-before-entering-to-temple-know-the-scientific-reason-2023-03-12

8. https://rahulsinghbauddha.wordpress.com/2021/05/10/%E0%A4%AE%E0%A4%82%E0%A4%A6%E0%A4%BF%E0%A4%B0-%E0%A4%AA%E0%A5%8D%E0%A4%B0%E0%A4%B5%E0%A5%87%E0%A4%B6-%E0%A4%95%E0%A5%87-%E0%A4%AA%E0%A5%8D%E0%A4%B0%E0%A4%BE%E0%A4%B0%E0%A4%82%E0%A4%AD-%E0%A4%AE/comment-page-1/

গুৱাহাটীত ছানী লিয়নী

ব্যস্ত মহানগৰী

গুৱাহাটীত ছানী লিয়নী

সাংবাদিকসকলৰ জিভালৈকে 

নিমখৰ সোৱাদ

ব্যস্ত কৃষ্ণ

ব্যস্ত বুদ্ধ

ব্যস্ত হজৰত

ব্যস্ত যীশু

আহক নিমখীয়া জীৱনলৈ স্বাগতম

नमकीन हो जाए ये ज़िन्दगी 

ময়ো এদিন 

ছানী লিয়নীৰ প্ৰেমত পৰিছিলোঁ

সুৰঙ্গ বিচাৰি 

আটলান্টিকৰ অতল গহ্বৰলৈকে 

গতি কৰিছিলোঁ 

ময়ো এদিন সপোনতে 

চিঞৰি উঠিছিলোঁ

উহ্ আহ্

অসহ্য এই যন্ত্ৰণা

মই মুক্তি বিচাৰোঁ

I have need haven

স্বৰ্গৰ পথ কোনফালে

বেহস্তলৈ যোৱাৰ সুৰঙ্গ কোনদিশে

মই উন্মাদ হৈ উঠিছিলোঁ

আৰু কাষত বিচাৰি পাইছিলোঁ

ছানী লিয়নীক

বহি আছে

देवी सानी लियोन

Godess Sunny Leone

जन्नत की हूर सानी लियोन

ধৰ্মই মানুহৰ মাজত

বিভেদৰ সৃষ্টি কৰে

আৰু তাৰ মাজতে

মানৱতাবাদী ৰূপে থিয় হৈ আছে

ছানী লিয়নী

হিন্দুৰ সপোনতো 

अप्सरा सानी लियोन

মুছলমান ख्वाबতো

जन्नत की हूर सानी लियोन

খ্ৰীষ্টানৰ ড্ৰিমতো

Nymph Sunny Leone

আহক আজি ৰাতিটোৰ বাবে

সকলোৱে এবাৰ ছানী লিয়নীৰ প্ৰেমত

উন্মাদ হওঁ !

✍ #কন্দৰ্পজিৎ

ঝুমবালিকা

ঝুমবালিকা, 

এদিন তোমাৰ 

শ্যামবৰ্ণ লাস্যময়ী চেহেৰাত 

মই ফ়িদা আছিলোঁ

এতিয়া এইবোৰ 

সাধুকথাৰ চৰিত্ৰৰ দৰে অতীত

তুমি এতিয়া “কিচ্ছাৰ ৰাজকুমাৰী”

আৰু মই মৃতপ্ৰায় দিৱানা

আকৌ এবাৰ 

তোমাৰ প্ৰেমত পৰিবলৈ মন যায়

হৃদয়খন কেৰেকি উন্মাদ হ'ব পৰাকৈ

দুপৰনিশা

ঝুমবালিকা,

তোমাৰ বাবেই এদিন দিবানা হৈ

পুথিভঁৰালত পঢ়িছিলোঁ

অপ্ৰেমৰ অকবিতা

আজি আকৌ এবাৰ

য়াদো কি বাৰিশ কী ইন্তজাৰ মেঁ

ৰিক্ত হাত

ৰিক্ত দিল

ৰিক্ত সময়

অথচ আজিও মোৰ 

দুচকুত আঁকি লওঁ

ডাৰ্ক কালাৰচ্ 

কালাৰিং পেইণ্টিং 

ঝুমবালিকা ...................

ঝুমবালিকা ................... !!!!!!

#কন্দৰ্পজিৎ

ᥬ𑐣শ། 𑇖૨ 𑐔𑐖།ৰ 𑐀𑐎ᥬ𑐔𑐜།

বতাহত ভাহিঁ আহি আছে

                  কিছুমান শব্দ

                  কোনোবাই কান্দি আছে

                কোনোবাই চিঞৰি আছে

কোনোবাই ছট্‌ফটাই আছে যন্ত্ৰনাত

          আচলতে কোনোবাই 

                  কান্দি আছে নে 

          আচলতে কোনোবাই 

                চিঞৰি আছে নে 

          আচলতে কোনোবাই 

ছট্‌ফটাই আছে নে যন্ত্ৰনাত

নে বতাহত ভাঁহি আহি আছে

        মৌথুনৰ নিশাদ-গান্ধাৰ

                            যিমানেই ৰাতি বাঢ়ে

                        সিমানেই কেঁকনি বাঢ়ে

যেন নৰিয়াত পৰি কান্দি আছে সময়ে

                        সময়, মোক দুছেও কৰা

            এছেও ৰাখি দিয়া সভ্য সমাজত

আন এছেও বন্দি কৰা অশ্লীল আন্ধাৰত

                                          #কন্দৰ্পজিৎ

ভালে আছুং

সত্যয় হউক বা

মিছায় হউক

বৰ্তমান মুঁই ভালে আছুং

খায়ায় আছুং চাই নাখেয়ায় আছু্ং

বৰ্তমান মুঁই ভালে আছুং

সুখতে আছুং কিম্বা দুখতে

বৰ্তমান মুঁই ভালে আছুং

মিছা কথা ক'বাৰ জানাটাও 

আক্‌টা কলা (Arts)

মিছা কৰিয়া হৈলেও

বৰ্তমান মুঁই ভালে আছুং

বিঃদ্ৰঃ - পৃথিবীত সব থাকিয়া বেসি কৰিয়া কোৱা মিছা কথাটায় হৈল ... "ভালে আছুং" 🤔

✍ কন্দৰ্পজিৎ

অনুপ্ৰেৰণা / উৎস : Sanjib Kumar Choudhury

মুঁই খুজিয়া থাকা মুখখান‌ হঠাৎ বিছ্‌ৰিয়া পালুং

মুঁই খুজিয়া থাকা মুখখান‌ 

হঠাৎ বিছ্‌ৰিয়া পালুং

মুঁই খুজিয়া থাকা মুখখান‌ 

কুনো হিন্দুৰ নাহায়

মুঁই খুজিয়া থাকা মুখখান‌

কুনো মুছলমানেৰ নাহায় 

মুঁই খুজিয়া থাকা মুখখান‌

আকজন মানুসেৰ মুখ

যেইখান মুখ

মুখেৰ ফা‌ঁকেৰ মুখা নাহায়

যেইখান মুখ কুনো মানুসেৰ নাহায়

যেইখান মুখ মানুসেৰ উপৰেৰ মানুসেৰ

হয়,

এমন আখান মুখেৰেয়

অপেক্ষাত আছিলুং মুঁই

কৌটি কৌটি বছৰ ধৰিয়া

হঠাৎ লাগাল পালুং অ'ক

কুনো আকটা ভিৰেৰ মাজত

(সবিশেষ পৰে হৈবে

পৰে আকদিন কৈম)

✍ কন্দৰ্পজিৎ

৩৬

.................. ৩৬ ..................

সময় গৈ থাকে

         গৈ গৈ ৰৈ যায়

         থমকি ৰ'য়

পুনঃ গৈ গৈ ৰৈ নোযোৱাৰ আশাত বন্দী হৈ

        গৈ গৈ ৩৫ টা বছৰ পাৰ হৈ গ'ল

ৰৈ ৰৈ স্মৃতিবোৰ মাথোঁ বকুত থমকি ৰ'ল

পাৰ হৈ যোৱা ধুমুহাই বিধ্বস্ত কৰা হৃদয়খনত

হঠাৎ সপোনবোৰ পৰাস্ত হৈ সৰি পৰিল

                    সৰি পৰিল মানে পৰিলেই

তথাপিও মৰুভূমিৰ মাজতো

           পানীৰ সপোন দেখোঁ

      কিন্তু জীৱনৰ গণিত বৰ জটিল

                       x-35 = ৰৈ থকা সময়

ধৰি লোৱা হ'ল x = Avg. Age 

                     ∴ x = 70

                           ∴ 70-35

                           = ³⁵/₇₀ 

                           = ½ %

ৰছীডাল দুটুকুৰা হ'ল

              এটুকুৰা ইফালে

              এটুকুৰা সিফালে

          মাজত ওলমি মই

প্ৰতিবছৰে একো একোটা সংখ্যাক

আদৰণি জনোৱাৰ দৰে 

এইবাৰ আদৰণি জনাব নোৱাৰিলোঁ 

36 - তোমাক🕯️

মই যিয়েই কৰোঁ বা নকৰোঁ

           সময় গৈয়েই থাকিব

                            ৰৈ নাযায় কেতিয়াও

ৰৈ নোযোৱালৈকে উশাহ-নিশাহ

গোপনে গোপনে

              অকলে অকলে

        সংগোপনে বিদায় জনালোঁ

                                     ৬ এপ্ৰিল

                     নাহিব অ' ৬ এপ্ৰিল 

মোৰ উশাহবোৰ চুটি হৈ যায় অ' !

                                        ৬ এপ্ৰিল !

     কিদৰে আদৰণি জনাম তোমাক ?

মই যে ইপাৰৰ পৰা সিপাৰ নেদেখোঁ !

                                 ✍ কন্দৰ্পজিৎ