সময় (কামতাপুৰী অকবিতা)

সময়

====

সময়!

সময়ে গতি বদলায়

তুয়ো জানিস মু‌ঁয়ো জানুং

কৰ্ণ কাৰ অবহেলাৰ শিকাৰ

কৰ্ণৰ কি দোষ আছিল

কি দোষ আছিল কৰ্ণৰ?

তুইতো ধৰ্মশাস্ত্ৰৰ বিষয়ে জানিস

জানিস ৰামায়ণ, মহাভাৰতেৰ কাহিনী

জানিস কীৰ্তন অথবা ভাগবতেৰ কিচ্ছা

তুইতো জানিস ন্যায় আৰ অন্যায় কাক কয়

তাৰ পৰেও কেনে তুই মৌন

তাৰ পৰেও কেনে তুই মৌন

কৰ্ণৰ নিঃস্বাৰ্থ আহুতি যজ্ঞত

কেনে তুই মৌন

একলব্যৰ বুঢ়া আঙুল কাটিয়া দেওয়াৰ স্বাৰ্থত

মুঁই মদ খাং

মদ খাইলে অন্ততঃ অল্প সময়েৰ জৈন্যে 

শান্তি পাং

মুঁয়ো জানুং এই শান্তিয়ে চিৰ শান্তি নাহায়

মুঁয়ো জানুং

হয়, মুঁয়ো জানুং

জানুং সগ, বুজুং সগ

তাৰ পৰেও মৌন

মোৰ মৌনতাক মোৰ অসহায়তা নাভাবিস

কিন্তু বাৰে বাৰে যে হয়া উঠুং কৰ্ণ কিম্বা একলব্য

একদিন মুয়ো তোৰ মতোন হোবাৰ চাছিলুং

এলা নাচাং

মুঁইতো মোৰ মতোনে

এলা চাং মোৰ মতোনে থাকিবাৰ আজীবন

কাৰণ মুঁই মোৰ থাকিয়া বদলিয়া যায়া

অন্যৰ মতোন হোবাৰ নাপাইম কুনোদিনে

বাদ দিলুং এইলা কথা

তোৰ মনত আছে না

১২/১৪ বছৰ আগেৰ কথা

১৪ বছৰ ৰামেও বনবাস খাটছিল

১৪ বছৰে মৌন আছিল অযোধ‌্যাবাসী

সম্প্ৰতি মুঁই মৌন বুদ্ধ

হাতত চাকনাৰ প্লেট

লগত হজৰত আৰ্ কৃষ্ণ!

(বি:দ্ৰ: ১ - মোৰ প্ৰিয় মানুষজনেৰ হাতত

অথচ এই মুহূৰ্ত্তত ক'বাৰ নাপাইম

উক্ত প্ৰিয় মানুষজন কায়)

(বি:দ্ৰ: ২ - অবশ্যে মুঁই জানুং যে

উক্ত প্ৰিয় মানুষজনে আকবাৰ হৈলেও 

মোৰ এই অকবিতাটা পড়িবো।)

(বি:দ্ৰ: ৩ - কিন্তু নাজানুং অ'য় মোৰ 

মনেৰ কথা বুজিব না নাই! 

না বুজিয়াও নাবুজা "ধৃতৰাষ্ট্ৰ" হ'বো।)