=======
এখন হাত
শব্দৰে প্ৰকাশ কৰিব নোৱাৰিলোঁ
এখন হাত
এটা কবিতা
কবিতা-অকবিতা একোৱেই নহ'ল
উমহু লিখিব নোৱাৰিলোঁ
আঁকিব নোৱাৰিলোঁ শব্দৰ আঁচ টানি
দূৰত্বই অনাস্পৰ্শৰ গৰ্ভলৈ ঠেলি দিয়া
এখন হাত
শৈশৱৰ সোণালী হাত
যৌৱনৰ ৰূপালী হাত
চকুপানী মচি দিবলৈও
এখন হাতৰ প্ৰয়োজন
মোৰ তৃতীয়খন হাত
অনাস্পৰ্শিত তৃতীয়খন হাত আছে সিপাৰে ৰৈ
আৰু ইপাৰে স্মৃতিৰ গৰল পান কৰি আছোঁ মই
এখন হাত ......
হাত নহয়
শৈশৱৰ মাত
যৌৱনৰ বাট
আৰু সম্প্ৰতি
সেই তৃতীয়খন হাত বিচাৰিলে
মোৰ চাৰিওফালে বৈ আহে
শূন্যতাৰ নিনাদ !
✍ কন্দৰ্পজিৎ
