=====
আহক কিছুদিনৰ বাবে হালধীয়া হওঁ
হালধীয়া সৰাপাত
হালধীয়া সংবাদ
হালধীয়া জীৱন
আহক কিছুদিনৰ বাবে
জখলাডাল আঁতৰাই থওঁ
প্ৰেমৰ জখলা
সম্পৰ্কৰ জখলা
উন্নতিৰ জখলা
উশাহ বৈ যোৱা জখলা
আহক কিছুদিনৰ বাবে চকুদুটা জপাই লওঁ
সপোনৰ চকু
অধ্যয়নৰ চকু
জ্ঞান-অজ্ঞানৰ চকু
পোহৰ চাই মেল খোৱা চকু
আহক কিছুদিনৰ বাবে
চুইংগাম চোবাই-চোবাই চিনেমা চাওঁ
বিচ্ছেদৰ চিনেমা
প্ৰেমহীনতাত নিঃস্ব হোৱা চিনেমা
সকলো হেৰুৱাই বাটৰুৱা হোৱা চিনেমা
জীৱনে ৰং সলোৱা চিনেমা
আহক কিছুদিনৰ বাবে বিচ্ছিন্ন হৈ ৰওঁ
বিচ্ছিন্ন পথ
বিচ্ছিন্ন নদী
বিচ্ছিন্ন ৰজনী
আহক কিছুদিনৰ বাবে বিচ্ছেদৰ গান গাওঁ
প্ৰেমৰ বিচ্ছেদ
সম্পৰ্কৰ বিচ্ছেদ
সময়ৰ বিচ্ছেদ
আহক কিছুদিনৰ বাবে
আমি মানুহবোৰ অমানুহ হৈ উঠোঁ
যাতে অমানুহবোৰ মানুহ হ'ব পাৰে !
✍ কন্দৰ্পজিৎ
No comments:
Post a Comment